प्रतिनिधी जुन्नर (पुणे):
मराठा आरक्षणासाठी मनोज जरांगे पाटील यांच्या नेतृत्वाखाली मुंबईकडे निघालेल्या मराठा आंदोलनाला एक दु:खद वळण लागले आहे. किल्ले शिवनेरीच्या पायथ्याशी एका मराठा आंदोलकाचा हृदयविकाराच्या तीव्र झटक्याने मृत्यू झाला आहे.
सतीश देशमुख (वय ४५, रा. वरपगाव, केज, जि. बीड) असे मृत आंदोलकाचे नाव असून, ते मुंबईतील आझाद मैदानावर सुरू असलेल्या मराठा समाजाच्या आंदोलनात सहभागी होण्यासाठी निघाले होते. त्यांच्या या आकस्मिक निधनाने आंदोलनावर शोककळा पसरली आहे.
काय घडले?
मराठा आरक्षणाच्या मागणीसाठी मनोज जरांगे पाटील यांनी काल (बुधवार) अंतरवली सराटी (जि. जालना) येथून हजारो मराठा बांधवांसह मुंबईकडे मोर्चा काढला आहे. राज्यातील विविध जिल्ह्यांतून मराठा समाज मोठ्या संख्येने मुंबईकडे कूच करत असताना ही दुर्दैवी घटना घडली. मुंबईकडे जाण्यापूर्वी जरांगे पाटील यांनी छत्रपती शिवाजी महाराजांची जन्मभूमी असलेल्या किल्ले शिवनेरीवर अभिवादन करण्यासाठी भेट दिली. याचवेळी किल्ल्याच्या पायथ्याशी सतीश देशमुख यांना हृदयविकाराचा झटका आला आणि त्यात त्यांचे निधन झाले.
मनोज जरांगे पाटलांनी वाहिली श्रद्धांजली
या घटनेनंतर आंदोलनस्थळी हळहळ व्यक्त करण्यात आली. मनोज जरांगे पाटील यांनी सतीश देशमुख यांना श्रद्धांजली अर्पण केली आणि त्यांच्या कुटुंबियांचे सांत्वन केले. या दुर्दैवी घटनेनंतरही जरांगे पाटील यांनी मराठा समाजाच्या आरक्षणाच्या मागणीसाठी आपला मुंबईकडे प्रवास सुरू ठेवला आहे. ते अहमदनगर येथे मराठा बांधवांशी संवाद साधणार आहेत.
मुंबईच्या आझाद मैदानाकडे जनसागर दरम्यान, मुंबईतील आझाद मैदानावर मराठा समाज बांधवांची गर्दी
मुंबईच्या आझाद मैदानाकडे जनसागर दरम्यान, मुंबईतील आझाद मैदानावर मराठा समाज बांधवांची गर्दी वाढत असून, राज्यभरातून आंदोलक मोठ्या संख्येने दाखल होत आहेत. मराठा आरक्षणाच्या मागणीसाठी जोरदार घोषणाबाजी सुरू आहे. ही गर्दी आतापर्यंतचे सर्व रेकॉर्ड मोडण्याची शक्यता वर्तवली जात आहे.
या आंदोलनाचे एक विशेष वैशिष्ट्य म्हणजे, मराठा समाजासोबत ओबीसी आणि मुस्लिम बांधवही मोठ्या संख्येने सहभागी झाले आहेत. त्यामुळे या ऐतिहासिक आंदोलनाकडे आता संपूर्ण महाराष्ट्रासह देशाचे लक्ष लागून राहिले आहे.
