मुंबई, [ १४/०८/२०२४: शेतकऱ्यांसाठी अत्यंत महत्त्वाच्या असलेल्या ई-पीक पाहणी (E-Pik Pahani) ॲपच्या सर्व्हरवर सध्या मोठा भार येत असल्याने तांत्रिक अडचणी निर्माण झाल्या आहेत. यामुळे पिकाची नोंदणी करताना शेतकऱ्यांना प्रचंड त्रास सहन करावा लागत आहे. या पार्श्वभूमीवर, शासनाने शेतकऱ्यांना एक महत्त्वपूर्ण आवाहन केले असून, ‘रात्री नोंदणी करून सकाळी शेतात पाहणी करा’ असा नवा सल्ला दिला आहे.
काय आहे नेमकी समस्या? खरीप हंगाम 2025-26 च्या पीक नोंदणीसाठी ई-पीक पाहणी ॲपवर (Digital Crop Survey) जीओ-टॅगिंग सुविधा असल्याने शेतकऱ्यांना प्रत्यक्ष शेतात जाऊनच पीक पाहणी करावी लागते. मात्र, सध्या सर्व्हरवर जास्त लोड असल्याने ॲप संथगतीने चालत आहे. यामुळे प्रत्यक्ष शेतात असूनही अक्षांश-रेखांश न मिळणे, फोटो क्लिक करून पिकाचा फोटो अपलोड होण्यासाठी बराच वेळ लागणे किंवा ॲप पुन्हा नव्याने सुरू होणे असे प्रकार घडत आहेत. सर्व्हरच्या संथ गतीमुळे ॲपला पुरेशा प्रमाणात त्याची जोड मिळत नसल्याने पीक नोंदणीत अडथळे येत आहेत. परिणामी, शेतकरी वारंवार प्रयत्न करून कंटाळले असून, ॲप व्यवस्थित चालत नसल्याचा त्यांचा गैरसमज झाला आहे. विशेष म्हणजे, गुगल प्ले स्टोअरवर उपलब्ध असलेले ई-पीक पाहणीचे ४.०.० हे नवीन व्हर्जन देखील शेतकऱ्यांसाठी अडचणीचे ठरत आहे.
शासनाचा शेतकऱ्यांना सोपा उपाय: या अडचणींवर मात करण्यासाठी शासनाने शेतकऱ्यांना एक सोपा आणि प्रभावी उपाय सुचवला आहे. त्यानुसार, शेतकऱ्यांनी पुढीलप्रमाणे कार्यवाही करावी:
- रात्री करा नोंदणी: रात्रीच्या वेळेस (जेव्हा नेटवर्क चांगले असेल, उदा. गावात/शहरात) ई-पीक पाहणी ॲपवर प्राथमिक नोंदणी प्रक्रिया पूर्ण करावी.
- सकाळी ऑफलाईन पाहणी: सकाळी शेतात जाऊन ऑफलाईन पद्धतीने पीक पाहणी पूर्ण करावी.
- पुन्हा रात्री अपलोड करा: दुसऱ्या रात्री चांगल्या नेटवर्कमध्ये येऊन मोबाईल ॲपमधील ‘अपलोड’ बटन दाबून सर्व डेटा सेव्ह करावा आणि नोंदणी प्रक्रिया पूर्ण करावी.
यामुळे काय होईल? या पद्धतीमुळे सर्व्हरवरील भार कमी होईल, शेतकऱ्यांचा वेळ वाचेल आणि त्यांना होणारा त्रास कमी होऊन पिकाची नोंदणी सहज पूर्ण होईल, असे शासनाने स्पष्ट केले आहे. ही सूचना शेतकऱ्यांच्या सोयीसाठी असून, वेळेत नोंदणी करून घ्यावी असे आवाहन करण्यात आले आहे.
अंतिम मुदत लक्षात ठेवा: शासनाने ई-पीक पाहणीसाठी १ ऑगस्ट ते १४ सप्टेंबरपर्यंत ४५ दिवसांची अंतिम मुदत दिली आहे. त्यामुळे या निर्धारित कालावधीत शेतकऱ्यांनी आपली पीक पाहणी पूर्ण करणे आवश्यक आहे.
