प्रतिनिधी:छ संभाजीनगर
डॉ. बाबासाहेब आंबेडकर मराठवाडा विद्यापीठाने गुरुवारी पदव्युत्तर अभ्यासक्रमांसाठी महाविद्यालयांची छाननी प्रक्रिया पूर्ण केली. आवश्यक नियम व सुविधा पूर्ण करणाऱ्या १३३ महाविद्यालयांना प्रवेशासाठी मान्यता देण्यात आली आहे, तर ५६ महाविद्यालयांचे प्रवेश अद्याप स्थगितच राहणार आहेत.
प्रकरणाची पार्श्वभूमी
विद्यापीठ अनुदान आयोग (यूजीसी) तसेच विद्यापीठाच्या नियमानुसार, पदव्युत्तर अभ्यासक्रम सुरू ठेवण्यासाठी महाविद्यालयांकडे पात्र प्राध्यापक, प्रयोगशाळा, वाचनालय आणि इतर आवश्यक सुविधा असणे बंधनकारक आहे. मागील महिन्यात विद्यापीठाने १९६ संलग्न महाविद्यालयांपैकी १८९ महाविद्यालयांची तपासणी केली असता गंभीर त्रुटी उघडकीस आल्या. काही विज्ञान शाखेतील महाविद्यालयांत प्रयोगशाळाच नव्हती, तर काहींनी प्राध्यापकांना नियमानुसार वेतन दिले नव्हते. काहींनी वेतनाचा पुरावा न देता असंबंधित कागदपत्रे सादर केली नसल्याने
मुदत व त्रुटी पूर्तता
या पार्श्वभूमीवर विद्यापीठाने २८ जुलैपर्यंत त्रुटी दुरुस्त करण्याची अंतिम मुदत जाहीर केली होती. नंतर ही मुदत ५ ऑगस्टपर्यंत वाढवण्यात आली. या कालावधीत अनेक महाविद्यालयांनी त्रुटी दूर करून आवश्यक कागदपत्रे सादर केली.
छाननी व अंतिम निर्णय
गुरुवारी झालेल्या अधिष्ठाता मंडळाच्या छाननी बैठकीत सादर केलेल्या माहितीची पडताळणी करण्यात आली. त्यानुसार १३३ महाविद्यालयांनी सर्व आवश्यक अटी पूर्ण केल्याने त्यांना प्रवेशासाठी हिरवा कंदील देण्यात आला. मात्र, उर्वरित ५६ महाविद्यालयांनी अद्याप नियमांची पूर्तता न केल्याने त्यांचे प्रवेश स्थगित ठेवण्यात आले आहेत.
विद्यापीठाचा इशारा
विद्यापीठ प्रशासनाने स्पष्ट केले आहे की शैक्षणिक गुणवत्तेचा दर्जा राखण्यासाठी नियमांचे पालन अनिवार्य आहे. सुविधा व पात्र शिक्षकांची पूर्तता न करणाऱ्या महाविद्यालयांना पदव्युत्तर प्रवेशाची मान्यता मिळणार नाही.
